卿卿隨筆（二）

九月開學，廿幾年黎第一次唔關我事。

話說...

卿卿隨筆（二）

九月開學，廿幾年黎第一次唔關我事。

話說卿卿係第一屆文憑試嘅白老鼠。當年唔知死走去讀理科，仲要入埋所謂嘅精英班。四科主修，再加上物理、化學、經濟同M1。卿卿呢啲擺明揀錯科嘅，成日考試墊屍底，身邊有啲同學甚至老師都唔太睇好我。

仲要成日不務正業，周圍去比賽，唔讀書。朗誦、演講、辯論，我全部有玩，嗰幾年喺呢幾方面都投放左好多心血。當年我玩雙語（英文同普通話）演講，學校冇咩資源，都係自己寫稿俾啲熟嘅老師睇，再自己練。玩吓玩吓，一個唔覺意又贏左幾年。村校出身贏到啲傳統名校嘅學生，唔係講笑，其實都幾爽。

不過啲獎係幫唔到你入大學。

當其他人不斷埋頭苦幹，卿卿就不斷去比賽。大概知道自己讀理科冇天份，俾心機都冇用。做白老鼠當然大家都膽顫心驚，但當時我睇穿左一樣其他人未必留意到嘅野：

卿卿喺大學想讀嘅科冇咁睇重理科成績

當時大學好多科收生都係睇4+1/best 5。我睇左大約三四年聯招嘅數據，約莫推測我嗰年兩大嘅收生情況。橫睇掂睇，我語文科本身有番少少斤重，中英文通識唔可能差，只要我經濟同數學醒醒定定，唔好講話大學，兩大應該都唔係問題。所以中六嗰年，我只力谷擅長嘅科目，其他嗰啲差唔多放棄咁滯。我係計過哂條數先咁做。

呢一招，經過左四五屆嘅文憑試同聯招，大概唔少人都已經識。但喺當年黎講，好聽少少就係兵行險着，難聽啲就係異想天開。

當時，可能我太有信心，不知天高地厚，似乎除左我自己之外冇咩人信我會入到兩大。其實我自己都好驚，本身係白老鼠已經好大壓力，身邊個個同學都好俾心機讀咁多科，我好擔心自己會失手，好驚冇書讀，好驚俾人笑。

最後卿卿差一分讀兩大法律系，差一分，我睇住個同學高我一分入左去（城大法律我夠分，不過冇揀，唉）不過，起碼入到港大，證明當時策略冇問題，叫做有啲交代。

最近同老母傾起，佢話當年覺得如果我入理大都算唔錯，跟本冇諗過我會入到兩大。我老豆更加好少理，你讀到就讀到，讀唔到都罷就。__！估唔到當年連佢地都對我冇咩信心。

一個小小嘅故事，有時候，人唔能夠吓吓跟大隊。唔同人能力唔同，人人都平均分配時間溫咁多科，唔代表我都要咁做。力谷自己嘅強項，一樣有出路。一定要相信自己。連你都唔信自己，邊個會信你？

更重要嘅係。卿卿呢啲，唔係叫好彩，而係事前做好準備應戰。唔係亂咁準備就叫做好功課，一定要看破紅塵，睇清楚成件事嘅大環境，再準備。小心唔好輕易俾表相鬼掩眼。人類其實好蠢，大把人隨波逐流，羊群心理。要睇清真相，唔容易。

特登寫呢一篇，除左係想同大家分享一個小小嘅故事，更係想提醒自己，唔好做一隻肥美嘅小羊。

---